منتديات شباب اليوم

منتديات شباب اليوم (https://vb.shbab7.com/)
-   منتدي المواضيع العامة والنقاش (https://vb.shbab7.com/f10)
-   -   هذا ماحدث مع اعضاء شباب اليوم فى مظاهرة 27 يناير (https://vb.shbab7.com/t92472)

MOODY 28 January، 2011 12:17 AM

هذا ماحدث مع اعضاء شباب اليوم فى مظاهرة 27 يناير
 
السلام عليكم ورحمة الله وبركاتة

النهاردة ياجماعه كان يوم مش عادي خاااااالص
احنا كالعادة الحمدلله مشاركين فى كل المظاهرات ووقفات الاحتجاجية ضد الفساد والظلم ،،

يوم 25 طلعنا طبعا مع المظاهرات فى الاسماعيلية ودي كانت الصور اللى صورتها بكاميرة الموبايل
http://vb.shbab7.com/showthread.php?t=91753

المشاركين
احمد عبدالله (الكبير اوووى- مروان )
محمود عبادى ( مودى)
احمد عبادى (ألجينرال - فهد )
محمد الامير (جولد ميرو - ميرو )


النهاردة طلعنا عادي زي كل يوم صحيت على 11 كدا لقيت ميرو جايلى البيت وكله همه ونشاط وبعده مروان و فهد كان فى البلد هناك
المهم شربت الحلبة طبعا بتفأل بيها هههههههه وطلعنا ،
مروان كان جايب علب الوان حيطان علشان ندهن بيها وشنا
بس كان ليها استعمال تاني يعنى

المهم نزلنا البلد وكانت المظاهرة فى منطقة اسمها المثلث (الممر)
اخدنا تاكسى ورحونا هناك لقينا قوات امن مركزى وقوان مكافحة شغب كتير جداااااا ودي الصور من هناك


http://vb.shbab7.com/shbab4/1327266346_676.jpg

http://vb.shbab7.com/shbab4/1327266342_217.jpg

http://vb.shbab7.com/shbab4/1327266336_643.jpg

عربيات الشرطة والامن والترحيلات فى كل مكان ، اعداد رهيبة

http://vb.shbab7.com/shbab4/1327266347_170.jpg

المهم احنا روحنا من شارع تاني بس فجأه مالقتش مروان وفهد كان موجود فى وسط الناس دى

http://vb.shbab7.com/shbab4/1327266321_290.jpg

هههههههههه تخيلو المنظر عامل ازاي شايفين السواد اللى حواليهم بس ماكنش فى مكان للخووف

http://vb.shbab7.com/shbab4/1327266320_417.jpg

http://vb.shbab7.com/shbab4/1327266351_227.jpg

والهتافات تتعالى
(الشعب ــــــــ يـريــد ـــــ اســقــــــاط النظااام)
كان فى حوالى 3 تجمعات زي دي
الامن طلع زكي وفرق المتظاهرين عن بعض بعمل كورديونات حول المتظاهرين

http://vb.shbab7.com/shbab4/1327266323_858.jpg

المهم حاولنا ندخل معاهم بس ماعرفناش الظباط والامناء شرطة كل اللى نقوله عايزين نتظاهر معاهم
اللى يقولنا روحو اتغدوا واللى يقول روحوا ذاكرو احسن
المهم جمعنا عدد كبير علشان ندخل وسطهم
بس كل المحاولات فشلت ،، لقينا ناس عامله مجموعة وفي فتحات وسط الامن المركزى وعرفنا ان احنا ندخل فى وسطهم
دخلنا والمجموعة دي كبرت جدااا وبدأت تتحرك الى الشارع الرئيسي والامن المركزى بيتحرك معاها والمظاهرين
يرفعوا الصوت الله اكبر الله اكبر

طبعا الوضع مش مطمن لقوات الامن ،، راحوا استعدوا عربيات تدعيم
وعربيات تفريق المظاهرات بالمأء
http://vb.shbab7.com/shbab4/1327266334_984.jpg

http://vb.shbab7.com/shbab4/1327266325_801.jpg

http://vb.shbab7.com/shbab4/1327266355_496.jpg

المظاهرة طلعت فى الشارع الرئيسي والعدد كبر
بس عدد قوات الامن كان بيزيد كل شوية (مش عارف بيجبوهم منين دول)

http://vb.shbab7.com/shbab4/1327266354_987.jpg

بعد الخروج من الكورديون وزيادة عدد المتظاهرين
قامت قوات الامن بعمل مناورات من الشوارع الجانبيه وتشكيل حلقات على المتظاهرين مع الاعتداء عليهم طبعا واعتقالهم

http://vb.shbab7.com/shbab4/1327266338_279.jpg


وتم استعمال من قبل قوات الامن عصا كهربائية لشل حركة المتظاهرين و اسبيراه فلفل
ورشة على عيوون المظاهرين واليكم الصورة التى توضح ذالك وهذه الاشاء محرمة دولياً

http://vb.shbab7.com/shbab4/1327266344_918.jpg




http://vb.shbab7.com/shbab4/1327266328_622.jpg

http://vb.shbab7.com/shbab4/1327266329_197.jpg
http://vb.shbab7.com/shbab4/1327266331_790.jpg

http://vb.shbab7.com/shbab4/1327266333_251.jpg

اشتدت حالة الغضب من المظاهرين وحدثت اشتباكات عديدة وااعتقلت قوات الامن المزيد
شباب وبنات

http://vb.shbab7.com/shbab4/1327266349_583.jpg

http://vb.shbab7.com/shbab4/1327266352_314.jpg

وتم اعتقال مودى ترحيلي الى معتقل عز الدين


http://vb.shbab7.com/shbab4/1327266346_676.jpg
==========================================
دخلت عربية الترحيلات كنت ممسوك من 4 قوات الامن وعدد المعتقلين وصل الى 80 معتقل من المظاهرات عند الممر وميادين وشوارع اخرى فى المدينة

دخلت العربية لقيت ناس مغمى عليها واللى وجهه احمر أحمراار شديد من مفعول اسبيريه الفلفل

المهم العربية طلعت من الممر وكان معايا فى العربية
مهندس ومحامى ودكتور بيطرى وشباب جامعات و اخوان مسلمين

قولنا هياخدونا على قسم شرطة مثلا ويحققوا لقيناهم طلعوا على معتقل عز الدين :2:

طبعا الناس خافت بس الحمدلله ربنا الهمنا الصبر نزلنا فى المعتقل
كان عددنا 15 فرد ،،
اخدوا البطايق والموبايلات واسامينا
وكل واحد اتفتش تفتيش زاااتى ودخلونا عنبر
المهم الاحداث سخنت جامد فى اسماعيليه بعد الاعتقالات وتم احراق قسم شرطة الشيخ زايد واعتصام المتظاهرين فى الميادين من اجل الافراج عن المعتقلين

الحمدلله كانت فى ناس عاقله جداا و الناس اتحلت بالصبر


كان اذان العصر بيأذن ،، كلنا اتوضينا وصلينا العصر ورا شيخ من الاخوان المسلمين
وقعدنا مع بعض نتكلم عن مصر والاحداث اللى بتحصل فيها
الدكتور اللى من الاخوان كان خبرة فى الحجات دي ههههههههه

المهم فضل يقولنا ياجماعه ان شاء الله خير المهم نحافظ على المكان اللى احنا فيه ده
ونشيل القمامة بعد ما ناكل وكدا وكل واحد عليه دورية كل يوم فى الاكل والصلاة
هههههههه احنا قولنا فل شكلها مطوله
وفضل بقى يتكلم عن الجهاد فى سبيل الله وبصراحة انا ارتحت من جوايا وحسيت انى صوتى طلع مابقتش بخاف من اي حاجة خلاص بعد ماقعدت فى عنبر المعتقلات ودخلت لانى بتظاهر من اجل بلدى وبدافع عن حقوقى ،،،

اتعرفنا على بعض واخدنا ارقام وايميلات بعض وفى ناس على فكرة منهم هيدخلوا شباب اليوم ان شاء الله النهاردة وبكرا ،،

باب المعتقل دق ! ،، لقينا عساكر جايه بحلة عدس و3 علب جبنه وعيش ابيض :2:

قعدنا وفرشنا اكلنا وبصراحة العدس كان جامد اووووى عايز اروح تانى عشان اكل منه

اتكلمنا كتييييييييييييييير بعد كدا عسكرى دخل ومعاة بطاطين
قولنا تمام القعدة شكلها فيها اسبوووع على الاقل

سلمنا امرنا لله بالدعاء ،،،

بعد كدا صلينا العشاء على الساعه 8
كله دخل اتوضا وصلينا واحنا فى الركعه الاخيرة ،، فضلنا ندعى كتييييير ،،
اللهم فك كربنا والحمدلله اثناء السجود
كان رئيس مباحث الاسماعيليه بيفتح باب الزنزانه ،، سمعناه صوته وهوا بيقول سبوهم يصلوا ،،، خلصنا صلى والحمدلله
اتفجأنا وهوا بيقول يالا ياجماعه علشان هتخرجوا

طلعنا واخدنا حاجتنا ،، اتصلت بأحمد اخويا
قالى انهم معتصمين فى ميدان المثلث علشان نخرج الناس اللى اعتقلت والحمدلله
ماكنش فى حل غير انهم يطلعونا علشان يفضوا الاعتصامات دي
انا بصراحة روحت على الممر تاني علشان لو فى حاجة :23:
بس كان الاعتصام خلص رجعنا البيت والحمدلله
ونازلين بكرا كلنا بعد صلاة الجمعه ومش هنسكت ،،
وبجد اتعلمت من الكام ساعة اللى فى المعتقل ده
حجات كتير اووووى ،، وكفاية انه كسر حاجز الخوف اللى جواانا
،، مروان كان اتاخد فى امن الدوله هوا وناس بس الحمدلله قدر انه يهرب ومشيوا


الحورية 28 January، 2011 12:37 AM

رد: هذا ماحدث مع اعضاء شباب اليوم فى مظاهرة 27 يناير
 
ايه الاحداث الجامدة اوي دي
ربنا يحميكم يا شباب والله انكم رجالة بجد
يا كده الرجالة يا بلاش
جدع يا مودي انت ومروان والشباب كلهم والله اثبتو انكم مصريين وشجعان بجد
بعدين السجن للرجااااااااااااااااااااااااااااااالة معروفة دي
ربنا معاكم يا رب
انا فرحانة اوي بيكم والله وفخورة



MOODY 2 February، 2011 12:29 PM

رد: هذا ماحدث مع اعضاء شباب اليوم فى مظاهرة 27 يناير
 
شكرا حورية على المرور
وهوا ماكنش سجن كان اعتقال بس مدة بسيطة بسبب الاعتصام اللى عملوه الشباب عشان اخرج
نورتى التوبيك

ROONY 2 February، 2011 12:50 PM

رد: هذا ماحدث مع اعضاء شباب اليوم فى مظاهرة 27 يناير
 
والله بجد حاجة تفرج
خرجنا من عقدة الخوف خلاص
الله يحميكم يا شباب
بجد ربنا يحفظك محمود

racha 2 February، 2011 1:39 PM

رد: هذا ماحدث مع اعضاء شباب اليوم فى مظاهرة 27 يناير
 
الحمدالله انكم طلعتو منها سااالمين لانى كنت بتاابع الاخبااار وخفت عليكم كثير الحمدالله ربنا ستر...

ضئ القمر 2 February، 2011 1:46 PM

رد: هذا ماحدث مع اعضاء شباب اليوم فى مظاهرة 27 يناير
 
انا بحس فيك يا مودى روح الشباب وبالذات الصورة اللى انت حططها عجبانى اوى بجد كل ما اشوفك بحس انى لسة فى رجالة بجد بتفاءل بيك وسالت ساسو عليك وزعلت لما عرفت انك اعتقلت بس يلا الاعتقال للرجالة هههههههههههههههه المهم انك عملت اللى فى دماغك ووقفت قصاد اى حاجة رجال يا مودى من يومك وبرضه عجبانى الصورة بس سؤال ليه حطط البتاع على بوقك


الساعة الآن 12:15 AM

Powered by vBulletin®Copyright ©2000 - 2014
جميع الحقوق محفوظة لمنتديات شباب اليوم 2018